Խնդիրներիդ լուծումները... երազներում

Հոգեբանները բացահայտել են անհավանական մի փաստ. երբ ջանում ես լուծում տալ քեզ անհանգստացնող որևէ խնդրի, մի փոքր ննջելը լավագույն մարտավարությունն է: Ուղեղդ, որը սովորաբար անջատվում է այդ ժամանակ, իրականում հակված է ամենախելամիտ որոշումներ կայացնելուն... մինչ դու քնած ես:

Խնդիրներ հաղթահարելը շատ հեշտ կարող է դառնալ: Պարզվում է, որ մենք կարող ենք տարբերակներ գտնել անլուծելի թվացող խնդիրների համար քնած ժամանակ, ավելին՝ այդ լուծումները հաճախ ավելի խելամիտ են, քան սթափ ժամանակ ծնվածները: Ինչո՞ւ: Որովհետև, գիտնականների հավաստմամբ, երազող ուղեղն ունակ է ավելի հեշտությամբ արթնացնել իր երևակայության շերտերը, ինչն էլ հանգեցնում է ավելի նորարարական լուծումների ի հայտ գալուն: «Երբ քնած ես, ուղեղի նախադիմային շերտն անջատվում է,- բացատրում է հոգեբան Դերդրե Բարեթը: - Սա այն հատվածն է, որը պատասխանատու է տրամաբանության համար և այն իր վրա է կրում կենցաղային խնդիրների ճնշումները: Երբ այս հատվածն անջատված է, դու դուրս ես կաղապարներից և, հետևաբար, ավելի ճկուն` խնդիրներին համապատասխան լուծում գտնելու»:

Այս պահին հավանաբար մտաբերում ես բոլոր այն արտառոց երազները, որ ունեցել ես և փորձում հասկանալ` ինչպես պետք է դրանք վերծանել` գտնելու խնդիրներիդ լուծման բանալին: Բանն այն է, որ եթե մարզես ուղեղդ (հեշտ է. ցույց կտանք` ինչպես), ստիպված չես լինի ապակոդավորել առեղծվածային տեսարանները. փոխարենը՝ երազում կտեսնես քո հարցի լուծման կոնկրետ և հստակ տեսարանը: Օրինակ՝ կարող ես ի մի բերել այն կոնկրետ բառերը, որ պետք է ասել կյանքդ դժոխքի վերածող տնօրենիդ: Կամ որոշես այն օրը, երբ պետք է ընկերոջդ երեսին նետես ողջ ճշմարտությունը: Եվ այսպես՝ ինչ պետք է անել այս ամենին հասնելու համար: Կատարիր 3 քայլ, և ամեն ինչ կստացվի ինքնաբերաբար:

Քայլ առաջին

Նախքան անկողին մտնելը մի փոքր սկսիր մտածել խնդրիդ շուրջ: «Երբ քնելուց առաջ որևէ բանի մասին մտածում ես, դրա շուրջ երազ տեսնելու հավանականությունը մեծանում է,- ասում է «Երազների բնույթն ու գործառույթները» աշխատության հեղինակ Էրնեստ Հարթմանը: - Որքան շատ մտորես այդ ուղղությամբ, այնքան ավելի կոնկրետ կլինի երազդ»: Նույնիսկ կարող ես այն գրի առնել: Ապացուցված է`գրի առնելով, այն ամրագրվում է ուղեղումդ: Կամ որևէ իր դիր ննջասենյակումդ, որը մշտապես կհիշեցնի այդ հարցի մասին, օրինակ` ընկերոջդ լուսանկարը, եթե վիճել եք: «Այս տեխնիկան արդյունավետ է գործում այն դեպքում, երբ քեզ տանջում է մի հարց, որն ունի մեծ հուզական և զգացմունքային ֆոն. օրինակ՝ ընտանեկան խնդիրներ ունես կամ մտորում ես աշխատանքից դուրս գալու մասին: Որքան հարցը կարևոր է, այնքան մեծ է քնած ժամանակ այդ հարցին լուծում գտնելու հավանականությունը»,- հավատացնում է դոկտոր Հարթմանը:

Քայլ երկրորդ

Ննջասենյակում՝ մահճակալիդ մոտ, թուղթ ու գրիչ դիր, որ գիշերն արթնանալու դեպքում անմիջապես գրի առնես երազդ: «Ինչպես գիտես, երազներն ակնթարթային են,- ասում է Բարեթը,- հետևաբար՝ գրի առ կոնկրետ կարևոր մանրամասները՝ քո օգտագործած բառերը, ցուցադրած ժեստերը: Որքան կոնկրետ են նշումներդ, այնքան խնդրին ամբողջական լուծում գտնելն ավելի հեշտ է»:

Քայլ երրորդ

Առավոտյան պառկիր անկողնում և փորձիր վերարտադրել` ինչ ես հիշում և ինչ ես գրի առել: «Կարևոր է կոնկրետացնել որքան հնարավոր է շատ և որքան հնարավոր է շուտ,- ասում է Բարեթը.- երբ արթնանում ես ու զբաղվում տարբեր գործերով, ուղեղդ լցվում է այլ տեղեկություններով, ինչը կարող է աղոտ դարձնել երազդ»:

Եվ վերջում, չմոռանաս մեկ անգամ էլ մտորել կայացրածդ որոշման շուրջ. գուցե որոշ շտկումների և լրացումների կարիք լինի. չէ՞ որ ուղեղիդ այն հատվածը, որը սովորաբար պատասխանատու է սոցիալական նորմերի համար, անջատված է եղել:

Հարցեր, պատասխաններ, մեկնաբանություններ